Мэндчилгээ

Монголын Үндэсний Музейд тавтай морилно уу.

Мянга мянган жилээр түүчээлэн өвлөгдсөн өв соёлын хөмрөг, уламжлалт мэдлэг ухааны их санг дэлхий нийтэд түгээх, ирээдүй хойч үедээ өвлүүлэн үлдээх чин зорилгоор урагш тэмүүлэн ажилладаг музейн хамт олноо төлөөлөн эрхэм үзэгч тантай мэндчилж буйдаа баяртай байна. Бид үндэстэнийхээ түүх, өв соёлын онцлогыг хадгалан хамгаалж, судлан дэлгэрүүлж,  улмаар хойч үедээ өвлөн уламжлуулах, музей-соёлын үйлчилгээг чанартай хүртээн эдийн засгийн эргэлтэнд оруулах ажлыг эрхэлж хөдөлмөр бүтээлийн арвин туршлага хуримтлуулан, ирээдүйд хийх, бүтээх их хүсэл тэмүүлэлээр дүүрэн ажилладаг.

Энэхүү цахим хуудсаараа дамжуулан мянга мянган жилийг өртөөлөн ирсэн өвөг дээдсийнхээ түүх соёл, музейн сан хөмрөгт хадгалагдаж байдаг хосгүй үнэт олдвор, үзмэрүүдээр түүвэрлэн дэглэж олон түмэнд үзүүлдэг байнгын болон түр үзэсгэлэнгүүд, музейн боловсрол, олон нийтийн хөтөлбөр, музейн мэргэжилтнүүдийг чадавхжуулах сургалт, цаг үеийн мэдээ мэдээллийг түгээх болно.

Монголын Үндэсний музейн цахим хуудсаар зочлон, эх орныхоо түүх соёлоор бахархан, өвөг дээсдийнхээ бүтээсэн гайхамшигтай агаад агуу түүхтэй танилцан, мартагдашгүй дурсамжаар хөглөгдөн аялахыг та бүхэндээ хүсч байна.

Дэлхийн талыг морин туурайгаараа тамгалан эзэлж явсан өвөг дээдсийн минь буян заяа, босоо хийморь та биднийг үргэлж ивээх болтугай.

Монголын Үндэсний Музейн Захирал

Түүхийн ухааны Доктор (Ph.D) Д.Сүхбаатар